Հանքավանում ուսումնամարզական հավաք անցկացնող «Ալաշկերտը» Հանքավանի խաղադաշտում ստուգողական հանդիպում անցկացրեց «Արարատի» հետ։ Հաղորդում է «Ալաշկերտի» մամուլի ծառայությունը:

Ալաշկերտցիների գլխավոր մարզիչ Արմեն Սանամյանի համար այս խաղը կարևոր էր թե կատարված աշխատանքի արդյունքները ամրագրելու, և թե փորձաշրջան անցնող նորեկներին գործի մեջ տեսնելու առումով։

Տեղեկացնենք, որ նորեկների թվում կային նաև լեգեոներներ, և նրանցից մեկը՝ բուլղարացի Վիկտոր Շիշկովն էլ հենց 8-րդ րոպեին բացեց խաղի հաշիվը։

Երկու թիմերն էլ անզիջում պայքար մղեցին. արդյունքն էլ գոլառատ եղավ՝ 3։3։ Մինչև 77-րդ րոպեն արարատցիներն առջևում էին 3։1 հաշվով /գոլերը հեղինակել էին Գևորգ Նռանյանը, սերբ Միլոշ Ստամենկովիչը և Արսեն Բալաբեկյանը/, սակայն ալաշկերտցիները դրսևորեցին կամային բարձր հատկանիշներ և 3 րոպեի ընթացքում երկու գոլ խփեցին․աչքի ընկան Միհրան Մանասյանն ու Անդրանիկ Կարապետյանը։

Հավելենք, որ հուլիսի 6-ին Ձորաղբյուրում միմյանց հետ կմրցեն այս նույն ակումբների դուստր թիմերը։ Խաղի սկիզբը՝ ժամը 17։00-ին։